July 30, 2017

ஜெயமோகனின் சமீபத்திய நான்கு நூல்கள்

சொல்லிமுடியாதவை, வலசைப் பறவை, கலாச்சார இந்து, உச்சவழு இவை நான்கும் தற்போது நற்றிணை வெளியிட்டுள்ள ஜெயமோகனின் நூல்கள். வழக்கமாக நற்றிணை செய்நேர்த்தியுடனும், அக்கறையுடனும் இந்த நூல்களைப் பதிப்பித்திருக்கிறது. இவை அனைத்தும் சிறிய புத்தகங்களே ஆனாலும், அவற்றையும் சிரத்தையுடன் கெட்டி அட்டையில், அழகிய அட்டைப் படங்களுடன் வெளியிட்டுள்ள நற்றிணையின் செயல்பாடு போற்றத்தக்கது. அனைத்துப் பதிப்பகங்களிலிருந்தும் தன்னை, தனது வெளியீடுகளை தனித்துவமிக்கதாக வெளிக்காட்டும் நற்றிணையின் உழைப்பும், கவனிப்பும் அசாதாரணமானது. சில படைப்பாளிகளின் நூல்கள் நம் கையிலிருப்பது எவ்வாறு பெருமையோ அவ்வாறே நற்றிணை நூல்கள் நம்வசம் இருப்பதும் பெருமதியானது.

உச்சவழு சிறுகதைத் தொகுதியில் பத்து கதைகள் இடம்பெற்றுள்ளன. இவற்றில் சமீபத்தல் வெளியாகி விவாதத்துக்குள்ளான வெற்றி சிறுகதை முதல், தற்போது சர்வதேச விருது பெற்ற பெரியம்மாவின் சொற்கள் கதைவரையிலும் இத்தொகுதியில் உள்ளன.

இத்தொகுதியிலுள்ள பெரும்பான்மையான கதைகளுக்கு நான் ஏற்கனவே என்னுடைய கருத்துக்களை பதிவுசெய்திருக்கிறேன். தற்போது அவற்றுக்கான இணைப்புகளைக் கீழே தருகிறேன். அவற்றை வாசிக்கும் வாசகர்கள் எவரேனும் இத்தொகுப்பை வாங்கும் உந்துதல் பெற்றால் அதுவே நான் எழுதியதின் பலன் எனக் கருதுகிறேன். 

கரடி
ஒரு கணத்துக்கு அப்பால்
பெரியம்மாவின் சொற்கள்
கயிற்றரவு
உச்சவழு


இத்தொகுப்பின் முன்னுரையில் கதைகளைக் குறித்து ஜெயமாகன் இப்படிச் சொல்கிறார்: “என் கதைகள் எவையும் அன்றாட வாழ்க்கையின் உணர்வுநிலைகளைச் சார்ந்தவை அல்ல. எளிய மெல்லுணர்வுகள் என எவையும் இதுகாறும் என்னால் எழுதப்படவில்லை என்பதைத் திரும்பிப்பார்க்கையில் தெளிவுறக்காண்கிறேன். என் ஆக்கங்கள் எப்போதுமே ஒட்டுமொத்தமாக வாழ்க்கையை நோக்குபவை, சிறுகதைகள் அந்நோக்கை ஒரு கணத்தில் குவிக்கமுயல்பவை. ஆன்மீகமான தத்தளிப்பும் தேடலும் கண்டடைதலும் மட்டுமே என் புனைவுகளின் உள்ளடக்கம். இவையும் அவ்வாறே.”

இத்தொகுப்பை சற்றே கூடுதல் கவனத்தோடு வாசிக்கும் அனைவருமே இதை உணரமுடியும். என்னைப் பொருத்தவரை இந்தக் கதைகளில் உச்சமான ஒரு கதை உண்டெனில் அது உச்சவழு எனலாம். அதையே இந்நூலுக்குத் தலைப்பாகச் சூட்டியிருப்பது பாராட்டத்தக்கது.

பிற நூல்களுக்கு அதன் பின் அட்டைக் குறிப்புகளை இங்கே தருகிறேன்.

கலாச்சார இந்து

இத்தொகுதியில் இந்துமதம், மெய்யறிவு குறித்து ஜெயமோகன் அவருடைய வாசகர்களுடன் செய்த உரையாடல்கள் கட்டுரை வடிவில் உள்ளன. நான் இந்துவா? எனக்கேட்கும் அடித்தளச் சாதியைச் சேர்ந்த ஒருவருக்கு மறுமொழி அளித்தபடி தொடங்கும் இந்நூல் நாத்திகத்துக்கும் இந்து மதத்துக்குமான உறவு, பண்பாட்டுக்கும் மதத்துக்குமான தொடர்பு, நம் குழந்தைகளுக்கு மதத்தை அறிமுகம் செய்யத்தான் வேண்டுமா போன்ற பல அடிப்படைக் கேள்விகளுக்கு விடை தேடிச்செல்கிறது.


சொல்லிமுடியாதவை

ஆசாரங்கள் தேவையா? பண்டிகைகள் கொண்டாடத்தான் வேண்டுமா? குடும்ப உறவில் ஏன் இத்தனை வன்முறை? தற்கொலை தியாகமாக ஆகுமா? செய்தொழிலைப் பழிக்கலாகுமா? நம் பண்பாட்டுக்கென உடை உண்டா? பெண்களின் கற்பு நிலையாக இருக்கவேண்டுமா? பண்பாட்டைச் சுமக்கத்தான் வேண்டுமா?

ஜெயமோகன் தன் நண்பர்கள், வாசகர்களின் வினாக்களுக்கு எழுதிய விடைகளாக அமந்த பண்பாட்டுக் கட்டுரைகள் இவை. நேரடியான கூரிய கருத்துகள். வரலாற்றுப்பின்புலம் தேடிச்சென்று விவாதிப்பவை.

வலசைப் பறவை

ஜெயமோகன் தன் தளத்தில் எழுதிய அரசியல் கட்டுரைகளின் தொகுதி இது.

“நான் இந்திய தேசியத்தில் நம்பிக்கை கொண்டவன். அதை ஒரு மத நம்பிக்கையாக அல்ல, ஒரு நடைமுறை வாய்ப்பாகவே கருதுகிறேன். மாபெரும் மானுடப்பரவல் கொண்ட இந்த நாடு ஒன்றாக இருந்தாலொழிய வளர முடியாது. பிரிந்தால் குருதிப்பெருக்கே எஞ்சும் என நம்புகிறேன். ஆகவே முதன்மையாக பிரிவினை அரசியல் பேசி சுயலாபம் தேடும் குழுக்களை, ஐந்தாம் படையினராகச் செயல்படும் அறிவுஜீவிகளேயே முதன்மையாக எதிர்கொள்கிறேன். தமிழ் அறிவுப்புலத்தில் மிகப்பெரிய சக்திகள் இவர்களே. மற்றபடி என் எதிர்வினைகள் எல்லாமே ஜனநாயகத்தில் நம்பிக்கை கொண்ட ஒரு பொதுக் குடிமகனுடையவை மட்டுமே. சாமானியனாக நின்று வரலாற்றை நோக்குவதே என் வழி. சாமானியனைவிட மேலதிகமாக என்னிடமிருப்பது தொகுத்து நோக்கும் மொழி மட்டுமே."
Related Posts Plugin for WordPress, Blogger...